كان فيه مطعم قلب الدنيا على السوشيال ميديا وطلبوا إن الناس تجرب أكلهم إسمه طعامة زمان

كان فيه مطعم قلب الدنيا على السوشيال ميديا وطلبوا إن الناس تجرب أكلهم إسمه طعامة زمان
الإسم حرفيًا ماشي أوي مع اللي بيقدموه سواء الديكورات أو الكراسي كلها بإستايل زمان🕐
الأسعار كمان حلوة بتبدأ من 10 جنيه لما فوق يعني تقدر تلاقي كل الأسعار اللي عاوزها وكذا نوع من الأكل😍
إحنا جربنا في الأول نوعين سجق واحد مشوي والتاني الطاجن الشرقي..
السجق المشوي كان شكله وطعمه خطير ودي كانت بداية مبشرة جدًا😌
أما الطاجن فده للناس اللي مش بتحب السجق المشوي بس طعمه كان جامد خصوصًا لما يبقى جنبه طبق رز بالشعرية وتخلطهم على بعض😋
جربنا كمان الكفتة ولإننا مؤمنين إن مفيش مطعم مشويات تروحله إلا وتطلب كفتة فكنا مقررين إننا لازم نجربها بعد السجق على طول
طعم الكفتة حلو أوي الشوي مظبوط والخلطة تحفة واللحمة مستوية بشكل تحفة
الشيش طاووق طلبناه وغمسناه مع الطحينة واللي لاحظناه إن الشيش طاووق معمول صدور مش وراك على عكس مطاعم كتير بس طعمه كان جامد والطحينة كانت تقيلة مش خفيفة ودي حاجة حلوة وكمية الطحينة في الطبق كانت كتير مش قليلة
كمان لو عاوز سلطة خضراء بيقدملهالك في سلطنية كده عشان تفتح نفسك أكتر على الأكل🥗
الكباب طعمه جميييل عارف كباب البيت بس بخلطة كده لذيذة أهو ده اللي لقيناه هناك والقطعية بتاعة اللحمة عبجتنا أوي
الحواوشي اللحمة كان حلو هو مفيهوش إختراعات بس قرمشته نفسها كانت خفيفة وحلوة وفيه اللحمة المفرومة معمولة حلو ويا سلام لو غمسته مع البابا غنوج وجبنة وحدة بطاطساية كده حاجة أخر إنشكاح🍟
الحمام المحشي كان تحفة هو عنده كذا نوع👈 محشي رز أو فريك وفيه المشوي أو المحمر
إحنا طلبنا الحمام المحشي رز كان محمروطالع منه الدخان كده حاجة تجوعك أكتر ما إنت جعان وريحته كانت جميلة والزيت مخليه بيلمع
الفرخة المشوية طلبناها مسحب لإننا أغلبنا ملوش في الفراخ بالعظم وكده بس كانت تحفة وطعم الفحم مخليها سخنة وحلو أوي
المحاشي بقى كانت مفاجأة يعني لو سألت على الأطباق المميزة بتاعتهم هيبقى المحاشي لإن طعمها مظبوط
جربنا بقى طاجن كمان غير السجق كان بطاطس بالفراخ عبارة عن الفراخ من تحت والبطاطس من فوق والحلو إن البطاطس مش معجنة والفراخ بتدوب كده مع شوية الرز بالشعرية كده فعلاً حاجة بطعامة زمان❤️
أخيرًا لو ليك في الساندوتشات ممكن تجرب البانيه المبروم على الفحم مع شوية البطاطس هيعجبوك فعلاً
وفيه عندهم وجبة أطفال عبارة عن مكرونة بصوص الطماطم وبانيه وبطاطس محمرة وسعرها 45 جنيه🤩
📍 العنوان: 4 شارع أبو هاشم – ميدان الخلفاوي – بجوار حلواني إيتوال – شبرا مصر
📍 للحجز والطلب: 01117155544 – 0222036866
#مطاعم #شبرا_مصر