الويك إند يحب الشوكولاتات والسكريات الكتير
فمشينا ندور في مدينة نصر بما إننا بنشتغل هناك عشان منلفش كتير ونضيع وقت⏱️
بس لحسن الحظ لقينا علم كده لفت نظرنا مكتوب عليه مولتن هاوس
المكان هتلاقوه قدام Talent Cafe
الحلو إن مفيش حد يخليك تطلب مشروبات زيادة بالعافية يعني تقدر تطلب الحاجة بتاعتك وتاكلها وتقعد براحتك😍
المكان قدامه ترابيزات لو عاوز تقعد في الهوا وفيه جوا صالة مكيفة وكبيرة☺️
لما شفنا المنيو إتفاجأنا من أسماء الحاجات المكتوبة يعني تخيل لما تلاقي فيه الإستهبال والفنكوش والإنحراف😂
فإتحمسنا نشوف إيه هي الحاجات دي
أول حاجة كانت الإستهبال ده عبارة عن طاجن براونيز عليه شوكولاتة عليها براوني وشوكولاتة تاني ومتغطي بالأوريو ومتجرنش كراميل وشوكولاتة وفيه طبعًا أيس كريم🍨
تقريبًا سبب إسمه الإستهبال لإنه بيرفع السكر على الأخر🤣🤣
طعمه كان تحفة بس لازم يتاكل ساقع لإنه لو ساح الأيس كريم مش هيبقى بحلاوته وهو ساقع😉
بعدين طلبنا الإنحراف لقيناه مولتن بس متقطع 3 حتت كبار وعليه فاكهة وبيتغرق بالأيس كريم والشوكولاتة فتحس غصب عنك بإغراء إنك هتخلص الطبق لوحدك بس طبعًا ده مش هيحصل وهتحتاج نفرين تلاتة معاك😄
طلبنا كمان الفنكوش عبارة عن طبقتين براونيز وعليها مارشميلو وفيه أيس كريم وشوكولاتة
كمان لقينا حاجة كده طلعت غريبة بس طعمها حوااار إسمها بيتزا وافل ودي لازم تتاكل بالشوكة والسكينة مش هينفع تتقطع بإيدك زي البيتزا العادية وإلا اللبس هيزعل😂😂
العجينة بتاعة الوافل حلوة أوي وبردو محتاجة نفرين تلاتة😇
التشيز كيك لوتس تحفة عندهم ويقدر ينسيك همومك بطعمه الساقع والدسم وفوقيه بسكوت اللوتس كده يا سلام على العشق..
ختمنا بمشروب الميلك شيك لوتس كان رهيييب
ولو عاوز تنزل تفطر في الويك إند ممكن تطلب الكورواسون عندهم أشكال كتير زي السادة والمربى..
وفيه كمان مولتن هاوس بان كيك طعمه جميل أوي
توتال التجربة بيقول إن الناس دي خبيرة في الشوكولاتات وبيلعبوا بيها لعب🥰
📍العنوان
79 شارع أبو داؤود الظاهري متفرع من مكرم عبيد بجوار البنك الأهلي
📱للتواصل
01153751055
#شوكولاتات #مدينة_نصر
