النهاردة جبنالكو مكان مش ناس كتير تعرفه مع انه في مكان حلو جدا و حيوي جدا و بيخدم منطقة كبيرة جدا دا غير انه عامل عرض جامد جدا هتعرفوه في اخر الفيديو من صاحب المكان نفسه لكل سكان مدينة نصر
المكان هو مطعم يم يم اللي هتلاقوه فى مدينة نصر تحت كوبري البطراوي في اتجاه جنينة مول و اول حاجة عاوزين نتكلم عنها و اللي لفتت نظرنا هي الاسعار بتاعته بصراحة اسعاره حلوة جدا مع اننا شوفنا نفس المنتجات اللي بيقدمها في اماكن تانية بضعف الاسعار بتاعته تقريبا دا غير انه مبياخدش خدمة ولا ضريبة تعالو نقولكو جربنا ايه هناك
اول حاجة جربناها هى التشيزي فرايز و اللي بنحب نبدأ بيها في اى مطعم لو لقيناها كويسة بنطمن و نكمل لقيناها مش اد كده ده مبيشجعناش و الحقيقة احنا جربنا عنده كذا تشيزى فرايز منها اللى بالهوت دوج و اللي باللحمة و السادة اللي عليها هالبينو ازوم الشطشطة بردو و الحقيقة كلهم كانو اجمد من بعض
اولا صوص الجبنة بتاعهم حلو اوى فعلا و البطاطس كميتها كبيرة و مخدومة سواء باللحمة المحمرة او اللي بالهوت دوج كانت فعلا مليانة و تحسها تشبعك كده مش مجرد ابيتيزر و خلاص
ندخل بقى ع التقيل جربنا من عندهم الباستا كانت ميكس جبن و كرسبي الفراخ كانت مقرمشة و طعمها حلو و الجبن اللي عليها كانت مدياها شكل و طعم حلوين هتحس فيهم بطعم الشيدر و الرومي لانهم كانوا مميزين اوي
جربنا كمان سندوتش الكرسبي تشيكن و ده كان فراخ كرسبي و معاها بيبروني مدخن طعمه كان حلو اوى و عليهم صوص جبنة و شوية توابل كانوا تحفة و بينزل معاهم صوص رانش بيزودهم حلاوة
و كمان جربنا البرجر بانواعه اللحمة و الفراخ برجر اللحمة كان حلو و توابله مظبوطة اوى و ده اللي خلاانا نسال علي الماركة بتاعته بس عرفنا انهم هما اللي بيعملوه بنفسهم و بيظيطوه الظبطة دي يعنى مش برجر جاهز لا هما الي بيجيبو اللحمة و يعملوها برجر بايديهم
و بصراحة لقيناهم كمان بيهتمو بتفاصيل صغيرة و منظمة و هما بيعملو الاكل زى انهم بيدوا العيش لون ع الجريل عشان يبقى لونه مميز و بيهتمو بدرجة سوا اللحمة نفسها عشان متبقاش نية ولا محروقة يعنى بيتابعو الحاجة حلو اوي
كمان جربنا برجر الفراخ الكرسبي و كان معاه اونيون رينجز و صوصات كتير كده كلهم كانوا حلوين اوى دا غير طبعا الصوص اللي كان لونه اورنج و معرفناش ده نوعه ايه بس لازم لما تروحو تجربوه
البكيني عندهم بقى دا حوار لوحده حرفيا ايه الطعامة و اللذاذة دي الهوت دوج كان مستوي اوى تحسه مشوي كده مع الصوصات و التوابل حقيقي كان طعمه مميز اوي
اخر حاجة ختمنا بيها بقى كانت طبق ريزو سغنون و حلو كده او احنا كنا فاكرينه كده بحكم اننا جربناه فى كذا مكان بس الغريبة انه كان كبير و مليان فراخ اوي غير ان الباربيكيو صوص و التشيلي صوص كانوا مديينه طعم حلو اوي
غير اننا عرفنا انهم بيعملو كمان كبدة و سجق مدخن و سجق عادي و ان كلهم حلوين لاننا شفناهم بيعملو اوردر لناس كانت بتطلب و كانت السندوتشات كبيرة و مليانة على عكس اللي بنشوفه فى اماكن تانية بس مقدرناش نجربهم بصراحة لاننا كنا خلاص مش قادرين نحط حاجة تانى في بقنا بعد الملحمة العظيمة دي
بصراحة المكان مميز في كل حاجة و في اسعارده كمان و لازم تجربوه
