أحلى حاجة في المكان لما تقعد تشم هواء في 3 أجواء مختلفة في مكان واحد
المكان هناك متقسم 3 إتجاهات:
1- Indoor:
وده هيعجبكم فيه الديكورات الشيك جدَا
وكمان الكنبة المريحة اللي رايحين مخصوص علشانها
2- Outdoor:
ده مكان في الهواء الطلق يعني ممكن جو زي دلوقتي لا حر ولا ساقع تقدر تقعد جواه وال Vibes بتاعته جميلة أوي
3- Panorama:
ده مكان مكيف بس كاشف المكان ومناسب لو بتحب تبقى في مكان كله إزاز يخليك تشوف الدنيا من برة وتعيش الأجواء وتستمتع بيها
نيجي للمنيو اللي هتلاقي فيها أكتر من صنف بكذا شكل ونوع يناسب كل الأذواق
ممكن تجيب شوربة كده تفتح نفسك على الأكل زي شوربة طماطم بالكريمة هتلاقوا طعمها حلو أوي ولما الجو يسقع شوية هتحسسكم بالدفا
أما لو عاوز مقبلات تفتح نفسك على الأكل أكتر ممكن تجرب سلطة ميسكولاري عبارة بطاطا مشوية مع ميكس جرين ومانجو والزبيب ودبس الرمان مع دريسنج الزيت مخلي طعمه حلو أوي
ولو ليك في السلطة الخضراء العادية جرب سلطة الجرجير معاها فلفل ألوان ومشروم مع طماطم شيري ولوز + دبس بلح وعصير ليمون وزيت الزيتون تحسه مرشوش عليها كده بكمية حلوة وفعلاً طعمها هيعجبك
أما لو بتحب المخللات تقدر تجرب الباذنجان المخلل تتبيلته مظبوطة وكمان بيعملوا الطحينة لو عاوز سلطة باردة بردو مميزة جدًا عندهم
بالنسبة للمقبلات الساخنة تقدر تجرب الناتشوز شيلي بيتقدم معاه صوص الجبنة واللحمة المفرومة والباربكيو والشيلي مايو صوص
نفسك بقى في ساندوتش برجر يحسن مزاجك ويفتح نفسك على الحياة جرب مشروم سويس برجر وده فيه برجر مشوي وخس مع سويس تشيز ومشروم + بصل مكرمل وخيار مخلل وفرايز وحاجات تانية
وتقدر تطلب كباب تركي سانوتش عبارة عن كفتة ملفوفة بالعيش مشوية على الفحم + فرايز
أما لو نفسك في طبق مكرونة يحتويك تقدر تطلب ماك تشيز بيبروني ويا سلام لما تلاقي معاها ميكس جبنة مع صوص الجبنة وهي نازلة بتغلي كده وتاكل طبق المكرونة مولع حقيقي مزاج مختلف
وكمان طلبنا فوتتشيني الفريدو جمبري معاها لوز محمص وجبنة بارميزان ومشروم مع صوص الكريمة والحلو إن كمية الجمبري حلوة أوي
وعنده نوعين من الفطير جربنا في الحادق السجق كيري كان تحفة والفطير الحلو فيه فطيرة النوتيلا بالبندق كانت حوار وسكرها مظبوط يعني مش هتجزع نفسك
وتقدر تطلب وجبة ميكس جريل عبارة عن قطع كباب وكفتة وصدور فراخ تكا مع الرز والسلطات ده غير السجق المشوي
محبين السلمون بقى يقدروا يجربوا سلمون شيلي صوص معاه فلفل ألوان وبصل وسمسم محمص + السويت شيلي والرز الأبيض وحاجات تانية كتير
ولإن عنوان المطعم الحلو بيظهر في البيتزا جربنا بيتزا عشاق اللحوم فيها ميكسات لحوم كتير مع الجبنة والصلصة اللي في البيتزا عجبتنا أوي وكمان العجينة كانت تحفة
فيه عندهم بردو منيو خاص بالمشروبات إحنا جربنا الأيس كوفي كان مبهر
يوم الجمعة بيعملوا فطار إسمه فطير مشلتت تقدر تجربه حادق بجبنة قديمة أو حلو بعسل إسود بالطحينة
أما لو قبلك بيوديك للفطار الشرقي هتلاقي عندهم اشكال وألوان بين فول وطعمية وبيض أومليت وحاجات مختلفة
العنوان:
fyves mall – الشيخ زايد
للتواصل:
01030782386
#خروجات #زايد
