مطاعم

حملة التدفئة من بهيج ملك الفسفور العجيب

هنعيش البهجة على أصولها

أكيد بيجي وقت عاوزين نغير حتى في أكلنا من برة

فبدل ما نقضيها فراخ ولحوم مفيش مانع لو أول الشهر بدأناه بشوية فسفور خصوصًا وإحنا لسة قابضين

هناك إنت بتاكل وليمة لإن الكميات حلوة أوي والحجم كمان مخدوم

الأجمل يا جماعة إنهم مش مبالغين في أسعارهم بالذات بعد زيادة الدولار ودي حاجة حلو جدًا

هناك هتلاقوا كل حاجة سواء صواني أو طواجن وباستا وكمان شورب وساندوتشات

في الأول جربنا باستا وايت صوص سي فود

فيه أماكن ممكن تعملها خفيفة زيادة أو تقيلة زيادة بس الصراحة عندهم الباستا مظبوطة

كمان فيها جمبري حجمه حلو والكمية عمومًا حلوة بس نصيحة لو هتاكل حاجة تانية بلاش تبدأ بيها أو تاكلها لوحدك عشان هتلكمك

جربنا كمان عرض 210 وده عرض مناسب ل 4 أفراد وسعره زي إسمه
الوجبة دي عبارة طبقين رز فليه وطبقين رز سادة و4 سمكات بلطي كل سمكة عاملة نص كيلو وكمان شوربة جمبري

في البداية جربنا الرز بالفيليه وحابين تعرفوا إن الرز مش معجن والفيليه كميته بردو كبيرة والطعم والريحة جنان
أما الرز السادة فيعجبك وتقدر تقطع عليه السمك البلطي هيعملوا ميكس حلو

أما البلطي ذات نفسه إنت هتلاقي السمكة لحمها حلو وبيدوب في البق غير إن طعمها ولون اللحمة نظيف
كأن اللحمة بيضاء زي القشطة

شوربة الجمبري تفتح النفس لإنه بيعملها في مج عليها اللوجو بتاعهم والريحة حوار والطعم خطير خصوصًا وهي نازلة سخنة كده
بس خد بالك إن كمية الشوربة كبيرة فلو ناوي تضرب أكلة تقيلة بلاش تبدأ بيها أو تاكلها لوحدك عشان هتتقل بطنك
أما مكونات شوربة الجمبري ففيها سي فود ما بين كابوريا وحاجات كتير وعلى فكرة حجم الكابوريا حلو جدًا لدرجة مش هتقدر تسيبها وهتطلعها من الشوربة تتعامل معاها وطعمها هيبسطك

دقنا بقى صينية بوري كريمي ودي صينية فيها سمك بوري مع بطاطس ومشكل سي فود
الغريب إننا متعودين على صينية بطاطس باللحمة أو الفراخ بس سمك وسي فود دي جديدة

الطعم بتاع الصينية دي تحفة ودسمة لدرجة كل ما تروح هناك ممكن متطلبش غيرها

طبعًا مينفعش نروح مكان عظمة زي كده بيعمل سي فود من غير ما نشوف جمبري الباطرفلاي بيقول إيه
الجمبري ده عليه صوص زبدة يوهم بجد ودسم بدرجة رهيبة ورغم إنك هتتعب شوية في تقشيره بس هتبقى مبسوط بالمجهود اللي بتبذله

تقدر تطلب رز سي فود والصراحة عاملين ميكس جميل

بالنسبة للساندوتشات تقدر تدوق عظمة جمبري الباترفلاي بصوص الزبدة في عيش فينو أو كمان السبيط

وفيه شوية كابوريا بالجبنة الموزاريلا عاملين دويتو رهيب لازم تجربه لو ليك في الموضوع ده

المنيو
https://www.facebook.com/baheg.eg/menu/?ref=PROFILE_PLUS_PINNED_UNIT

العنوان
التجمع الخامس – الحي التاني- جاردينيا مول بجوار حواوشي الرفاعي

للتواصل
01203111170

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى