اللي راح تركيا أو متابع أكلاتها أكيد سمع عن أكله إسمها الكومبير
ودي أكلة تركية فيها بطاطس وشوية ميكسات تكيفك
وكان مهم بالنسبة لنا كمحبين للأكل التركي إننا نجرب مطعم Potela
وده مطعم متخصص في الأكل التركي
عنده فروع كتير زي مكرم عبيد وشبرا والسواح
إحنا رحنا مكرم عبيد لإنه كان قريب مننا والصراحة المكان لطيف من حيث إن الترابيزات في الهواء وفيه زي أرضية كده شبه الجنينة فشكلها لطيف أوي
كمان لقينا المنيو عندهم كتير ما بين حاجات جاهزة وحاجات من إختيارك بتشكلهم مع بعض
فتعالوا نبدأ التجربة ونقولكم لقينا إيه..
طلبنا كومبير فاهيتا وكومبير إستيك وفيه نوع عيش كده حلو هنقولكم عليه وبعدها ختمنا بتحلية
الأول حابين نقولكم إن Potela ميكس بين البطاطا والبطاطس وده هتلاقوه مكتوب في المنيو بتاعهم
نيجي لكومبير الإستيك وده عليه مشروم وبصل مكرمل ولحم الإستيك وبطاطس وجبنة وساور كريم
الجبنة على فكرة بتبقى موزاريلا
الحجم كبير جمب السعر وكمان الكمية حلوة ومليانة
إحنا جبنا المعلقة ولمينا في القطمة الواحدة الميكس الجميل ده عشان نجرب كله مع بعضه والصراحة طعمها حلو جدًا والبطاطس خصوصًا جميلة لإن عليها الزبدة عاملة شغل حلو ودسمة فبتشبع
بيعمل بقى حاجة كده تقدر تفصل بيها أو تشتريها مخصوص تتسلى بيها وإنت ماشي إسمها كانابيه
وده توست محمص عليه توابل للتسلية وعليه كمان الزبدة وأعشاب زي الزعتر وبشكل عام طعمه عجبنا
نيجي للفاهيتا عشان يبقى جربنا اللحمة والفراخ
الفاهيتا عليها زبدة وجبنة وتشيكن و4 أنواع خضار من إختيارك والسعر مناسب
إحنا بقى عملنا زي الإستيك خدنا معلقة مليانة كل المكونات والميكس بتاع الخضار والفراخ والبطاطس والجبنة مع الزبدة عاملين حلاوة مش طبيعية
في الأخر جينا لأهم فقرة وهي التحلية لإنها زي مصنع السعادة كده
طلبنا سويت بطاطا عليها كريمة لباني وموز ولوتس ونوتيلا وعليها رشة فسدق
إحنا جربنا كل نص لوحده:
– النوتيلا سكرها مظبوط والموز كاسر أي تجزيع ده غير إن الكريمة اللباني بتطري على الواحد كده
– أما اللوتس هتلاقي فيه سنة قرفة بس الطعم ككل جامد
بشكل عام المكان ده بيعمل أكل حلو أوي وفريش والكواليتي رائعة
المنيو:
https://www.facebook.com/PotelaEgypt/menu/?id=100076163897331&sk=menu
العنوان:
7A Makram Ebeid, Al Manteqah as Sadesah, Nasr City – Cairo Governorate.
للتواصل:
16312
