النهاردة بالنسبالنا في الايام هو يوم السعادة و ده لاننا كنا في المكان اللى بيعتبره كل محب للشوكولاته سر سعادته اللى مخبيه عن الناس
المكان هو فلافر بار و تجربتنا كانت في فرع الكوربة اللى جنب قهوة اسوان
طبعا هو فرع محندق كده و صغنون و قعداته كلها الكراسي العالية على البار بس القعدة المحندقة دي كفيلة توديك في عالم تانى
اولا هو المكان ديكوراته حلوة و هاديو و هنلاقي الوان الشوكولاته حوالينا في كل حتة و المنيو متعلق قدامنا اول ما ندخل المحل غير انهم عاملين تست لكل منتجاتهم موجود في تلاجة العرض اللي قدام المحل
احنا جرربنا يومها كذا حاجة اول حاجة كان لازم نجربها هى البان كيك ميكس الاختراع الجديد بتاعهم و اغلى حاجة موجودة في المكان بس بصراحة يستاهل هو كان ميني بان كيك كتير اوي و معاهم وايت شوكليت و بلاك شوكليت
احساس البان كيك و هو غرقان في الشوكولاتة و طالع على بقك و الشوكولاتة بتنزل منه كده احساس بيدخل القلب على طول و على فكرة هو كبير يكفي فردين و سعره كان 60 جنيه بس فعلا هتنبسطوا بيه اوي
تانى حاجة بقى كان طاجن النوتيلا بالايس كريم
كان طاجن طبقة رفيعة جدا من الكيك متغرق نوتيلا كتيرررر اوى و بولة ايس كريم فانيللا بتسيح على الشوكليت مع الكيكة كده بتديك ميكس رهيب في الطعم و احساسك و انتا بتاكله
تالت حاجة بقى كانت اختراع الفولكانو و اللي باين من اسمه طبعا انه انفجار شوكلاتة و هو عبارة عن شوكليت كيك غرقان شوكولاتة و وايت شوكليت و مكسرات و ملفوف على شكل جار كده اول ما تشد الورق الملفوف بيها ها تلاقي الفولكانو اللي قدامك انفجر ببركان شوكليت جميل يغرق الطبق و يمتع العين
اخر حاجة بقى ختمنا بيها كانت الوافل المشهور بتاعهم و اللي معروف بحجمه الكبير و طعمه المميز اوى و طبعا غرقان شوكولاته احنا جربناه ميكس نص شوكليت و نص لوتس و طبعا الشوكليت ها يكون احلى من اللوتس بالنسبة للناس اللى مش بتحب القرفة زيي و العكس طبعا
في النهاية المكان جامد جدا و عندهم دليفري لكل حتة و هيفضل هو ده سر السعادة لاى حد بيحب الشوكولاتة
ممكن تتابعو كل فيديوهاتنا على موقع و قناة مصر اونلاين
